Nyadi kena ka ujong taun tu tadi genturong menua ba Pantu din kelebih agi ba Pengkalan Pantu dia, bisi dua kali renggat sida dipindahka orang laban ti kena penusah ampuh bah ketegal ari ti kelalu balat ujan. Penusah tu nuntong mega ba menua kami din, tang ukai kena rumah panjai semina penusah jalai alun ti dikena kami berundang keluar masuk enda ulih tengah ketegal kena ampuh maya nya. Nyadi jalai alun diatu siti ari siti kemudahan keno ko orang ti amat beguna amat ba menua kami. Aku kala madahka ba blog tu pasal pemedis rumah panjai kami ari Ubah, Isu, Tekuyong, Empaling, Gayau, Semawa, Muding, Keranggas sereta Munggu Sawa enti nadai bisi jalai alun tu. Nyadi kira ka 25 ngagai 31.12.2011 tu tadi jalai alun kami tu enda ulih kena sereta tengah laban ampu bah. Pia mega laban jalai kami tu endang jalai ladang ti betanah liat iya mayuh runtuh, luchak sereta bekebung laban penusah bah tu. Iya ti diasai ka aku empu lebuh maya tu tadi, kami sebilik enda ulih ngemulaika diri kena ka 27.12.2011 laban jalai ti dikena keluar ianya jalai antara menua kami enggau Menua Isu ampuh naka dada maya nya. Semadi kena ka 28.12.2011 tu tadi ari bisi surut naka lebih ari pala patung. Nya pen keluar semadi ngena motor tinggi baka Hilux. Mayuh bala ti nguji keluar ngena motor mit sangkut sereta bisi sekeda rosak. Nyadi ketegal ari penusah tu kami manua tunga ti disebut aku tadi bisi bendar pengarap jalai sereta Jambatan Pantu/ Jambatan Strap jampat tembu awak ka bisi mai penyamai mimit ka kami. Laban enti ditanya siko-siko tuboh mensia dia sigi ngarapka penusah tu nadai tentu nuntong kami. Kabuah pia laban jalai sungai enda ulih dikena agi maya kemarau,udah putus laban pasir. Pia mega ngagai kompeni di beempuka jalai arapka ulih ngaga ngerepair jalai nya belama nya meh, semadi nganti menua kami kin digaga jalai ti manah digaga perintah empu seumba enggau jambatan nya siap jemah...
Gambar ti nunjuokka takas peninggi ai sereta penyauh jalai ti ampu bah maya nya.
Bala nyau nurun dulu beratika peninggi ai sereta penyauh iya. Semina kereta tauka motor tinggi aja ulih nenggah jalai tu maya nya.
Tiada ulasan:
Catat Ulasan